Joan den urrian, Pirinioetan aurkeztu zen ‘Pirenaeus. Pirinioen mendebaldeko erromatar galtzada’ liburua. Aranzadi Zientzia Elkartearen argitalpen berriak urteetako ikerketa arkeologiko eta historikoen emaitzak biltzen ditu, antzinako erromatar galtzadaren eta Pirinioetako bi isurialdeak lotzen dituen lurraldearen inguruan.
Liburua Artziko Jauregian, Donazaharren, Luzaideko zineman eta Aurizko Kultur Etxean aurkeztu zen. Erromatar galtzadaren inguruko hamar aztarnategitan 2011tik egindako lanen emaitza nagusiak jasotzen ditu, Oztibarretik (Donazaharre) Longida bailararaino. Arreta berezia eskaintzen die Artzi eta Zalduako erromatar galtzadaren inguruako eraikinak, urte luzez induskatu baitira. Argazkien, mapen, ilustrazioen eta berreraikuntza grafikoen bidez, argitalpenak inguruko ondare arkeologikoa modu dibulgatibo eta zorrotzean ezagutzeko aukera ematen du. Ondare hori K.o. I. eta V. mendeen artekoa da.
Pirenaeus argitalpena 2023tik garatutako mugaz gaindiko proiektu baten emaitza da. Hasieran Aurizko eta Donazaharreko udalek hartu zuten parte, eta gero Luzaide eta Arztibarko Udala ere batu zen. Ekimenak Pirinioetako bi isurialdeen arteko lotura historikoa aldarrikatzen du, eta ikertzaileen, erakundeen eta herritarren elkarlana nabarmentzen du. Haien inplikazioa funtsezkoa izan da ondare horren ezagutza eta hedapena sustatzeko.
Aurkezpenek ikerketetan parte hartu duten pertsona guztiei eskerrak emateko eta lurraldeko memoria historikoa zaintzearen garrantzia azpimarratzeko ere balio izan zuten.
